मंडळी !मी मागे सांगितलंच आहे की जी व्यक्ती ,काही काळ ,नागपूरात राहून गेलेली आहे ,तिला इथल्या आठवणी ह्या येतच असतात ! माझे पण तसेच आहे ! काल दुपारी,असाच
निवांत बसलो असतांना ,अगदी अवचितपणे ,महाल बाजार आठवून
गेला- ७० च्या दशकातला ! चला,एक
फेरफटका मारून येऊ !
प्रथम एक सांगायचे ते हे की त्या काळी, नागपूरात , परिपूर्ण बाजारपेठा म्हणाल तर गांधीबाग- इतवारी ,महाल ,बर्डी , धरमपेठ - गोकुळ पेठ आणि सदर ,नाही का ? इतर बाजार ,आकाराला यायचे होते.
गंमत म्हणजे , रेशीमबाग, हनुमान नगर येथिल लोकं महाल बाजारात
यायचे आणि महालाची मंडळी ,मोठी
खरेदी असेल तर इतवारी कडे
वळायची !
आता महाल बाजार बद्दल बोलायचे
झाले तर याचे साधारण ३ भाग पडू
शकतात. पहिला म्हणजे बंदिस्त भाजी बाजार ,दुसरा केळीबाग रोड आणि तिसरा, नरसिंग टाॅकीज - टिळक पुतळा रोड , बरोबर ना ?
बंदिस्त भाजी बाजार याला ३ प्रवेश द्वार - एक कल्याणेश्वर मंदिर कडून,दुसरं राजविलास टाॅकीज कडून
आणि तिसरं कोतवाली कडे उघडणारे. आत काही पक्की दुकानं
पण होती ,जिथं पूजा सामग्री, द्रोण पत्रावळी इ मिळत असे. भाजी विक्री
साठी ओटे बांधलेले होते. कोतवाली
कडे उघडणाऱ्या द्वारातून बाहेर आलो
की डावीकडे लागायचे आग्रा भंडार
( इथली खवा जिलेबी प्रसिद्ध) आणि
उजवीकडे , श्रीरंग स्टील.
केळीबाग रोड वर काही फॅन्सी वस्तू
दुकानं ,कापड दुकानं आठवतात आणि आंबेकर लोणी आणि रमेश
ग्रामोफोन. पुढे बडकस चौकात डावीकडे ,राम भंडार !
आता जर नरसिंग टाॅकीज - टिळक
पुतळा रोड वर आलो तर काही ठळक
दुकानं म्हणून पुस्तक आणि स्टेशनरी( ठाकूर आणि कं तथा
कर्मवीर बुक डेपो) ,औषधं( अमृत
फार्मसी आणि मुकुंदराय , शिवाय
बरीच जनरल दुकानं. गांधीगेट पुढे
आलं की चढावावर डावीकडे एक
पेपर, नियतकालिके यांचे दुकान आणि चढाव संपला की उजवीकडे
कोकणी- कोल्हापूरी चपलांचे दुकानं.
पण महाल बाजार काही इथंच संपत
नव्हता तर काही, कल्याणेश्वर मंदिर -
झेंडा चौक (नगारखाना रोड) यावर
पण ,सीझन प्रमाणे जसे गणेश मूर्ती,,
पणत्या , रांगोळी इ. इथंच पुढे लाह्या
फुटाणे वाले(भडभूंजे) यांची काही दुकानं होती
असा होता , सर्वसमावेशक आणि
परिपूर्ण ,महाल बाजार.... आजही
आहे